Ərzaqlar

Alt Qatı Üçün

250 qram Sadə Peçenye

1 stəkan Fındıq

150 qram Kərə Yağı

Pendirli Qatı Üçün

300 qram Krem Pendir

1,5 stəkan Qaymaq

və ya süzmə qatıq

1 stəkan Şəkər Tozu

3 ədəd Yumurta

3 silə xörək qaşığı Un

1 desert qaşığı Nişasta

1/2 Limonun Suyu

1 ədəd Limonun Rəndələnmiş Qabığı

1 paket Vanil

Limonlu Sous Üçün

1/2 stəkan Su

1/2 stəkan Süd

5 xörək qaşığı Şəkər Tozu

2,5 silə xörək qaşığı Nişasta

1 ədəd Yumurtanın Sarısı

1 ədəd Limonun Suyu

1/2 Limonun Rəndələnmiş Qabığı

1 paket Vanil

1/4 çay qaşığı Sarıkök

Servis Üçün

Limon

istəyə görə

Nar

istəyə görə

Məlumat

Dünyaca sevilən Çizkek (ing. Cheesecake, “pendirli keks“) min illərdi Avropada hazırlanan bir şirniyyatdır. Uzun illər adi pendir ilə hazırlansa da, ilk dəfə Amerikada (New York’da) krem-pendir ilə hazırlanıb və bu günkü gündə çizkek krem-pendir ilə hazırlanır. Çizkekin bir çox növü var. Alt qatı qurabiyə və fındıq qarışığı, ara qatı pendirli qarışıq və üst qatı isə (istəyə görə) müxtəlif meyvə və ya şokolad sousları ilə hazırlanır. Eyni zamanda bişirilən və bişirilməyən çizkeklər var. Hər 2 növ çizkek azı 5 saat soyuducuda gözlədilməlidir. Ancaq 1 gün öncədən hazırlanarsa, daha yaxşı olar.

Mənim bu gün paylaşdığım isə turş sevənlər üçün limonlu və bişirilən çizkekdir.

Diametri – 25 sm (kilidli list)

Qeydlər:

Çizkeki bişməyə qoyarkən sobaya başqa bir qabda yanına su qoyulmalıdır. Çünki cheesecake bişərkən qurumamalı, üzəri isə çatlamamalıdır (əgər çatlayarsa da dərd eləməyin) Yanına qoyulan su sobada havanın nəm olmağı üçündür. Təxminən 45-50 dəqiqə bişəcək. Üstü qızarmamalıdır, ağ qalmalıdır. Bişdiyini anlamaq üçün qabı yavaş tərpədin, əgər kənarları bərkiyib və ortası biraz sirkələnirsə hazırdır, ortasının bərkiməyini gözləməyin. Hazır olduqda sobanı söndürüb qapağını açın və sobada 20-30 dəqiqə saxlayın. Daha sonra çıxardın və otaq istiyinə gələnədək limonlu sousu hazırlayın.
Bişirdiyimiz çizkek bərkiməsi üçün 1 günsoyuducuda gözlədilməlidir. Əgər 1 gün vaxtınız yoxdursa, azı 5-7 saat gözlədin.

Hazırlanması

1 Hazırdır	Alt Qatını Hazırlamaq Üçün Peçenye və fındıq blendrda toz halına gətirilir.
2 Hazırdır	Sonra kərə yağı əridilib əlavə edilir və qarışdırlır.
3 Hazırdır	Daha sonra kilidli listə tökülüb hər tərəfinə yayılır və əl ilə basaraq bərkidilir.
4 Hazırdır	Pendirli Qatını Hazırlamaq Üçün Pendir və qaymaq mikserlə 30-35 saniyə çalınır (pendirli qatı hazırlayarkən mikser sonadək zəif gücdə istifadə olunmalıdır).
5 Hazırdır	Sonra şəkər tozu əlavə edilib bir-birinə qarışanadək çalınır.
6 Hazırdır	Daha sonra yumurtalar tək-tək əlavə edilib çalınır (yumurtalar sırayla tək-tək çalınmalıdır, hamısı eyni anda əlavə edilməməlidir).
7 Hazırdır 30-35 saniyə	Sonra limonun qabığı və suyu, nişasta, un və vanil əlavə edilib 30-35 saniyə daha çalınır.
8 Hazırdır 160° C	Sonda isə hazırlanan alt qatın üzərinə əlavə edilir, ətrafının qızarmamağı üçün list falqa ilə bükülür və əvvəlcədən isidilmiş 160° C sobada təxminən 45-50 dəqiqə bişirilir (paylaşımın məlumat bölməsindəki qeydi mütləq oxuyun).
9 Hazırdır	Limonlu Sousu Hazırlamaq Üçün Limonlu sousu hazırlamaq üçün vanil və sarıkök xaric bütün ərzaqlar bir qazanda ocağın üzərinə qoyulur və qaynayıb biraz qatılaşanadək qarışdırmağa ara vermədən bişirilir. Ocağın üzərindən götürən kimi vanil və sarıkök əlavə edilib qarışdırılır (hazır olduqda otaq istiliyinə gələnədək ara-ara qarışdırın ki, üzü qaymaqlanmasın).
10 Hazırdır 24 saat	Otaq istiliyinə gəldikdə isə pendirli qatın üzərinə əlavə edilir, hər tərəfinə yayılır və soyuducuda bərkiməyi üçün 1 gün gözlədilir.
11 Hazırdır	Listdən çıxardarkən əvvəlcə bıçaqla kənarlarını listdən aralayın, sonra kilidini açın.
12 Hazırdır	Servis Etmək Üçün Servis edərkən istəyə görə limon və nar dənəsi ilə bəzədilir.
13 Hazırdır	Nuş olsun... :)